1Sa 25 | ZomZIV | STEP | Tu-in Samuel si-a Israel khempeuh kikhawmin amah kah uh a; Ramah a, a innah a vui uh hi. Tua ciangin Maon Sehnel-gam ah David a kikhinsuk hi.

1 Samuel 25

David, Nabal le Abigail

1 Tu-in Samuel si-a Israel khempeuh kikhawmin amah kah uh a; Ramah a, a innah a vui uh hi.

Tua ciangin Maon ^{▼▼25.1 Septuagint khutgelh pawlkhat; Hebrew ah Paran} Sehnel-gam ah David a kikhinsuk hi. 2 Carmel ah neihsa a nei Maon a teng mipa khat in neihsa a hau mahmah hi. Amah in keel tulkhat le tuu tulthum nei-a, tuate Carmel ah a mul a met hi. 3 Ama min Nabal hi-a a zi min Abigail ahi hi. Tuanu tei le melhoih a thuah khat hi-a a pasal ahileh Caleb-te hi-in, a lungtom a gilo khat ahi hi.

4 Sehnel-gam ah David a om laitakin Nabal tuumul met ahilam a za khin hi. 5 Amah in tangval sawm sawlin, “Carmel a Nabal kiangah va pai unla kei minin va hopih un. 6 Ama kiangah, ‘Na khan sawt ta hen! Nang le na innkuanpihte na ci uh dam ta hen! Na neihsa khempeuh cidam ta hen! ^b

7 “‘Tu-in tuumul met hun ta hi, ci-in ka za hi. Na tuucingte uh ko kiangah hong om sungun amaute bawlsia loin Carmel a, a om sungteng uh bangmah a mangsak kei uh hi. 8 Na nasemte dong lecin hong gen ding uh hi. Tua ahi ciangin pawi huna hong pai ka hi buangun ka tangvalte na angvan in. Nong hehpihna-in na nasemte le na tapa David ading na muh peuhpeuh na pia in,’ ci hi, ci un,” a ci hi.

9 David mite a tun uh ciangin David minin hih thupuak Nabal tungah a gen uh hi. Tua khit ciangin a ngak uh hi.

10 Nabal in David nasemte kiangah, “Hih David na cih uh kua ahi hiam? Hih Jesse’ tapa kua ahi hiam? Tu hunin a pute kiang pana tai nasem tampi om hi. 11 Bang hangin hong paina uh ka theih loh mite tungah ka anlumte, tuite le ka ganmul mette adingin ka gawhsate pia ding ka hi hiam?” ci-in a dawng hi.

12 David mite kileh hei-in a ciah kik uh hi. Amaute a tun uh ciangin a gen khempeuh a zasak uh hi. 13 David in a mite kiangah, “Na namsau uh kuah un!” a ci hi. Tua ciangin amaute in a namsau uh kuah uh a, David in ama aa a kuah hi. Mi zali khawng David tawh kuankhawmin zanih in a vante uh a ngak uh hi. ^c

14 A nasemte khat in Nabal zi Abigail kiangah; “David in sehnel-gam panin kamtai hong sawla, ka pu uh hopihsak napi amah in amaute a salgawp hi. 15 Tua hi napi ko tungah hong migi uh hi. Amaute kiang lopaangah ka om sung tawntung uh hong bawlsia lo uh a, ka bangmah uh zong ka mansuah kei uh hi. 16 Amaute kiangah ka gante uh ka cin sung tawntungun amaute ka kulh uh ahi hi. 17 Tu-in bang hihsak thei na hi hiam, ngaihsun pha in; bang hang hiam cih leh i pu le a innkuanpih tungah tuahsiatna a tung dinga omsa ahi hi. Amah lah a ngoltol kuama hopih theih loh ahi hi,” ci-in a gen hi. ^d

18 Abigail a kithawipah cingteng hi. Amah in anlum zanih, zu savun um nih, tuu semsa nga, an kansa seah ^{▼▼25.18 Tua in seng khat bang hi kha ding (litre 37 bang)} nga, lenggah-keu beu zakhat le theigah ho beu zanih laate tungah a suan hi. 19 Tua ciangin tuanu in a nasemte kiangah, “Na masa un; kong zui ding hi,” a ci hi. Ahi hangin a pasal Nabal kiangah a gen kei hi.

20 Amah laa tungah tuanga mualkawm ah a pai laitakin David le a mite ama lam manawhin tuaksuk uh a, a kituak uh hi. 21 David in, “Hih mipa neihsa sehnel gamah khat beek a pelhem loh nadingin ka vilsakna khempeuh - a mawkna suak hi. Amah in apha asia-in hong thuk hi. 22 Zingsang ciangin amah tawh kisai khempeuh pasal khat zong ka sit tak leh Pasian in nasiatakin David ^{▼▼25.22 Septuagint khutgelh pawlkhat; Hebrew ah David’ galte tawh} hong thuk ta hen!” a ci khin phet ahi hi. ^g

23 Abigail in David a muh ciangin a laa tung pan kumkhia-a, David mai-ah a khup lamin a boksuk hi. 24 A khe phungah puka: “Ka topa aw, mawhsakna kei bek hong khusak in. Hong hehpih inla na nasemnu thu hong gensak in; na nasemnu thugen na ngaihsak in. 25 Ka topa in tua mi ngoltolpa Nabal thugen bangmahin sim kei in. Ama min Mihai hi a - a min zui-in a haitat hi lel hi. Na nasemnu kei mahmah in ka pu in nong sawl mite ka na mu kha kei hi. ^h

26 “Ka topa aw, nang sisan luansak nading le phu na lak nading panin na khut mahmah TOPA in hong khoh nungsang, TOPA nuntakna le nang nuntakna ka lo hi, nangma galte le ka pu a nasak nuam khempeuh Nabal tawh kibang ta hen. 27 Tuateh hih letsong, na nasemnu in ka pu kong puak, nang hong zui mite tungah hong piasak in 28 TOPA in ka pu’ kumpi-gui kizomsuaksak taktak ding ahi manin nong hehpihna-in ka khialhna hong maisak in; bang hang hiam cih leh amah in TOPA galte a do hi. Na nuntak sung tawntung nang tungah khialhna kimu kei ta hen. 29 Mi khatpeuh in hong that dingin hong delh ciang nangawnin TOPA na Pasian in a nungtate a humbitna sungah ka pu nuntakna a humbit ding hi. Ahi hangin na galte nuntakna suanglotna kuanga lot bangin a lawn ding hi. 30 TOPA in amah tawh kisai na hoih khempeuh ka pu adingin a sep khit ciang le amah Israel makai a suah khit ciangin 31 a thu om lopi-a sisan luansakna ahi-a, nang mahmah in phu na lak loh ahi zongin nang adingin lungkimlohna le vangik a suak kei ding hi. Tua hi a TOPA in ka pu hong gualzawhsak ciangin na nasemnu hong mangngilh kei in,” a ci hi. ⁱ

32 David in Abigail kiangah, “Tuni-in kei dawn dinga nang hong sawl TOPA, Israel’ Pasian, kiphat ta hen. 33 Tuni-in sisan suah lo ding le kei mahmah khuta phula lo dingin thukhensatna hoih na neih manin thupha ngah ta in. 34 Kei hong dawn dingin hong kuankhia pah lo hi lecin nang kong natsak nading pana kei hong kempa TOPA, Israel’ Pasian nuntakna lo-a kong geninah, zingsang nisuah ciangin Nabal tawh kisai pasal khempeuh khat zong ka sit kei ding hi,” a ci hi. ^j

35 Tua ciangin tuanu in David a puakte tuanu khut panin sanga, “Lungnuamin ciah in. Na thugente ka za khina, nong ngetna kong pia hi,” a ci hi. ^k

36 Nabal kiangah Abigail a pai ciangin kumpi khat bangin a inn sungah pawi a na bawl hi. Amah in zu kham mahmah a, a lungsim a kiliansak hi. Tua ahi ciangin tuanu in khuavak mateng bangmah a gen kei hi. 37 Zingsang Nabal zukham a phat ciangin a zi in hih thu khempeuh ko a, a lungtang khawlin suangtum a bang hi. 38 Tua zawh ni sawm ciangin TOPA in Nabal sata a si hi. ^l

39 Nabal sih a zak ciangin David in, “Kei hong simmawh Nabal tungah ka thuk nading pana hong lencip TOPA kiphat ta hen. Amah in ka khialh nading panin hong kema, Nabal khialhna ama lutungah a tusak hi,” a ci hi.

Tua ciangin David in Abigail thu zasak a, a zi dingin a dongsak hi. 40 A nasemte Carmel ah pai-in Abigail kiangah, “David in a zi dingin nang a la dinga hong sawl ahi hi,” a ci uh hi.

41 Tuanu in a mai leilam ngatin kunsuk a, “Hih lai-ah na nasemnu uh note nasem ding le ka pu nasemte khe a silsak dingin a kithawisa ahi hi,” a ci hi. 42 Abigail laa tungah tuangpah-a, a nasem numeite nga in amah zui-in David kamtaite tawh ton uh a ama zi a suak hi. 43 David in Jezreel a Ahinoam zong na tenpih khin a, amaute gel a zi ahi uh hi. 44 Ahi hangin Saul in David zi a tanu Michal, Gallam pana Laish’ tapa Patiel ^{▼▼25.44 Hebrew Palti Patiel tawh kilamdang lo} tawh a kitengsak khin hi. ⁿ